Det er alltid knytt stor spenning til starten på ein ny sesong for laksefiske.  I natt ved midnatt starta årets sesong i Toåa, og det var nok venta at det skulle bli resultat ganske fort, ettersom det er fin fiskarelv med rundt 20 m2/sek på Storfossen i går kveld.  Deit første timane gikk og laksebettet såg vi lite til dei første timane.  Men rundt lunchtida i dag var det resultat, da Nils Harald Øyen Kvande tok ein på 5,39 kg i Nedre Oddøyhølen og omtrent samtidig tok Erik Evavold ein på 3,5 kg i Båthølen – ein kilometer lenger oppe i elva. 

Begge to ser ut til å være villaks, og det var litt lus på begge laksane som no altså er komne på land.  Det er fleire som har rapportert at vatnet i Toåa er i kaldaste laget – det var snakk om 5-6 grader i natt.  Det er nokså mykje snø i fjellet, så det pågår nok snøsmelting som enno påverkar temperaturen.  Elveeigarlaget har alt solgt dei fleste fiskekorta dei par første dagane av laksefisket, medan det enno var nokre stenger ledig hos Todalshytta i dag tidleg. 

Nils Harald fortel at han har base hos bestefar og bestemor på Hjellå når han fiskar i Toåa.  Nils senior var nok ein habil laksefiskar tidlegare og Nils Harald fortel at han og bestefar har kampert mykje i lag i Toåa i barndommen.  Nils Harald var godt nøgd med dagens resultat, og fortalte at det var nokre få lus på laksen han tok på land.  

Laksen på 5,4 kg som Nils harald tok – eit flott emsemplar og forhåpentleg vis ein ekte «todaling»! Foto Nils Harald Øyen Kvande